ಹಾಗಾಗಿ, ಕೂದಲಿಗೆ ಅಗತ್ಯವಿರುವ ಪೋಷಣೆಯನ್ನು ನೀಡಲೇಬೇಕು ಹಾಗೂ ಕಾಳಜಿಯನ್ನು ವಹಿಸಲೇಬೇಕು. ಆದರೆ ಕಾಳಜಿ ವಹಿಸುವ ಭರದಲ್ಲಿ ಪ್ರಬಲ ರಾಸಾಯನಿಕಯುಕ್ತ ದುಬಾರಿ ಪ್ರಸಾದನಗಳನ್ನು ತಂದು ಹಚ್ಚಿಕೊಂಡರೆ ಇದು ಇನ್ನಷ್ಟು ಪರಿಸ್ಥಿತಿಯನ್ನು ಬಿಗಡಾಯಿಸಿ ಹೆಚ್ಚಿನ ಹಾನಿಯುಂಟುಮಾಡಬಹುದು. ಹಾಗಾಗಿ ಈ ಸಮಯದಲ್ಲಿ ಕೊಂಚ ತಾಳ್ಮೆ ವಹಿಸಿ ನಿಸರ್ಗದ ಸಹಾಯ ಪಡೆಯುವುದೇ ಅತಿ ಉತ್ತಮವಾದ ಮಾರ್ಗವಾಗಿದೆ. ಅದರಲ್ಲೂ, ಈ ಕೆಲಸವನ್ನು ಸಮರ್ಥವಾಗಿ ನಿಭಾಯಿಸುವ ಮನೆಮದ್ದುಗಳು ನಮ್ಮ ಅಡುಗೆ ಮನೆಯಲ್ಲಿಯೇ ಲಭ್ಯವಿರುವಾಗ ಅಂಗೈಯಲ್ಲಿ ತುಪ್ಪ ಇಟ್ಟುಕೊಂಡು ಊರೆಲ್ಲಾ ಅಲೆಯುವುದೇಕೆ?
ತ್ವಚೆಯ ಮತ್ತು ಕೂದಲ ಆರೈಕೆಯ ವಿಷಯ ಬಂದಾಗ ಇದು ಅಷ್ಟು ಸುಲಭವಲ್ಲ ಎಂದು ಹೆಚ್ಚಿನ ಮಹಿಳೆಯರಿಗೆ ಗೊತ್ತು. ದುಬಾರಿ ಪ್ರಸಾದನಗಳ ಬಳಕೆಯಿಂದ ತಕ್ಷಣಕ್ಕೇನೋ ಉತ್ತಮ ಪರಿಣಾಮ ಕಂಡುಬರಬಹುದು, ಆದರೆ ದೀರ್ಘಾವಧಿಯಲ್ಲಿ ಇವು ಮಾರಕವೇ ಆಗಬಹುದಾದ ಕಾರಣ ಕೂದಲ ಆರೈಕೆಗೆ ಮನೆಮದ್ದುಗಳೇ ಸರಿ. ಕೊಂಚ ನಿಧಾನವಾದರೂ ಸರಿ, ಉತ್ತಮ ಪೋಷಣೆ ನೀಡುವ ಇವು ಯಾವುದೇ ಅಡ್ಡಪರಿಣಾಮವಿಲ್ಲದೇ ಸುರಕ್ಷಿತವಾಗಿವೆ ಹಾಗೂ ಅತ್ಯಂತ ಅಗ್ಗವೂ ಆಗಿವೆ. ಬನ್ನಿ, ಈ ಪ್ರಸಾದನಗಳ ಬಗ್ಗೆ ಅರಿಯೋಣ:
*ಆಲಿವ್ ಎಣ್ಣೆ
ಒಂದು ವೇಳೆ ಕೂದಲು ತೀರಾ ಒಣಗಿದ್ದರೆ ಇದಕ್ಕೆ ಸೂಕ್ತ ತೇವಾಂಶ ಒದಗಿಸಲು ಆಲಿವ್ ಎಣ್ಣೆ ಅತ್ಯುತ್ತಮವಾಗಿದೆ. ಈ ಎಣ್ಣೆಯನ್ನು ಹಚ್ಚಿಕೊಳ್ಳುವ ಮೂಲಕ ತಲೆಯ ತ್ವಚೆಯಲ್ಲಿ ಆರ್ದ್ರತೆ ದೊರಕುತ್ತದೆ ಹಾಗೂ ಕೂದಲ ಬುಡ ಗಟ್ಟಿಗೊಳ್ಳುವ ಜೊತೆಗೇ ತಲೆಹೊಟ್ಟು ಸಹಾ ಸಡಿಲಗೊಂಡು ನಿವಾರಣೆಯಾಗುತ್ತದೆ. ಕೂದಲ ಬುಡ ಗಟ್ಟಿಯಾದರೆ ಕೂದಲು ಉದುರುವುದು ತನ್ನಿಂತಾನೇ ನಿಲ್ಲುತ್ತದೆ ಹಾಗೂ ಕೂದಲು ಸಹಾ ದೃಢವಾಗುತ್ತದೆ. ಬನ್ನಿ, ಈ ಎಣ್ಣೆಯನ್ನು ಬಳಸುವುದು ಹೇಗೆ ಎಂಬುದನ್ನು ನೋಡೋಣ:
ಅಗತ್ಯವಿರುವ ಸಾಮಾಗ್ರಿಗಳು:
*2 ದೊಡ್ಡ ಚಮಚ ಆಲಿವ್ ಎಣ್ಣೆ
ತಯಾರಿಸುವ ವಿಧಾನ:
ರಾತ್ರಿ ಮಲಗುವ ಮುನ್ನ ಕೊಂಚ ಹೆಚ್ಚೇ ಪ್ರಮಾಣದಲ್ಲಿ ಆಲಿವ್ ಎಣ್ಣೆಯನ್ನು ತಲೆಯ ಚರ್ಮದಲ್ಲಿ ಕೂದಲ ಬುಡಕ್ಕೆ ಧಾರಾಳವಾಗಿ ತಾಕುವಂತೆ ಹಚ್ಚಿ ನಯವಾಗಿ ಮಸಾಜ್ ಮಾಡಿಕೊಳ್ಳಿ
ಸುಮಾರು ಮೂರರಿಂದ ಐದು ನಿಮಿಷ ಮಸಾಜ್ ಮಾಡಿದ ಬಳಿಕ ತಲೆಯ ಅಡಿ ದಪ್ಪ ಟವೆಲ್ಲನ್ನಿರಿಸಿ ರಾತ್ರಿ ಮಲಗಿ.
ಮರುದಿನ ಬೆಳಿಗ್ಗೆ ನಿಮ್ಮ ನಿತ್ಯದ ಶಾಂಪೂ ಬಳಸಿ ಸ್ನಾನ ಮಾಡಿ ಬಳಿಕ ಕಂಡೀಶನರ್‌ನಿಂದ ತೊಳೆದುಕೊಳ್ಳಿ.
ಉತ್ತಮ ಪರಿಣಾಮಕ್ಕಾಗಿ ಈ ವಿಧಾನವನ್ನು ವಾರಕ್ಕೆರಡು ಬಾರಿ ಅನುಸರಿಸಿ.
*ಮದರಂಗಿಯ ಎಣ್ಣೆ
ಒಂದು ವೇಳೆ ಧೂಳುಭರಿತ ವಾತಾವರಣವಿದ್ದು ತಲೆಯ ಚರ್ಮದಲ್ಲಿ ಅಂಟಿಕೊಂಡು ಬಾಚಣಿಗೆಯ ತುದಿಗಳಲ್ಲಿ ಕಂಡುಬರುತ್ತಿದ್ದರೆ ಈ ಧೂಳು ನಿಮ್ಮ ಕೂದಲ ಬುಡಗಳನ್ನು ಮುಚ್ಚಿರಬಹುದು. ತನ್ಮೂಲಕ ನೆತ್ತಿಯ ಚರ್ಮದಲ್ಲಿ ಪಿ ಎಚ್ ಮಟ್ಟ ಏರುಪೇರಾಗಿರುತ್ತದೆ ಹಾಗೂ ಇದೇ ಕಾರಣಕ್ಕೆ ಕೂದಲು ಉದುರುತ್ತಿರುತ್ತದೆ. ಇದನ್ನು ಸರಿಪಡಿಸಲು ಮದರಂಗಿ ಎಣ್ಣೆಯೇ ಅತ್ಯುತ್ತಮವಾದ ಆಯ್ಕೆಯಾಗಿದ್ದು ಮುಚ್ಚಿದ್ದ ಸೂಕ್ಷ್ಮರಂಧ್ರಗಳನ್ನು ತೆರೆದು ಸ್ವಚ್ಛಗೊಳಿಸಿ ಆರೋಗ್ಯಕರ ಕೂದಲ ಬೆಳವಣಿಗೆಗೆ ನೆರವಾಗುತ್ತದೆ.
ಅಗತ್ಯವಿರುವ ಸಾಮಾಗ್ರಿಗಳು
*2 ದೊಡ್ಡ ಚಮಚ ಮದರಂಗಿಯ ಎಣ್ಣೆ
ತಯಾರಿಸುವ ವಿಧಾನ:
*ಒಂದು ಬೋಗುಣಿಯಲ್ಲಿ ಕೊಂಚ ಮದರಂಗಿ ಎಣ್ಣೆಯನ್ನು ತೆಗೆದುಕೊಂಡು ಇದರಲ್ಲಿ ಹತ್ತಿಯುಂಡೆಯನ್ನು ಆದಿಟ್ಟುಕೊಳ್ಳಿ. ತಲೆಗೂದಲನ್ನು ವಿಭಾಗಿಸುತ್ತಾ ಸ್ಪಷ್ಟವಾಗಿ ಕಾಣುವ ತಲೆಯ ಚರ್ಮದ ಭಾಗಕ್ಕೆ ಈ ಹತ್ತಿಯಿಂದ ಎಣ್ಣೆಯನ್ನು ಹಚ್ಚುತ್ತಾ ಹೋಗಿ, ಇಡಿಯ ತಲೆಯನ್ನು ಎಣ್ಣೆಯಿಂದ ಆವರಿಸಿ.
*ವಿಶೇಷವಾಗಿ ಹೆಚ್ಚು ಕೂದಲು ಉದುರಿರುವ ಭಾಗಕ್ಕೆ ಹೆಚ್ಚಿನ ಪ್ರಮಾಣದ ಎಣ್ಣೆ ಹಚ್ಚಿ. ಬಳಿಕ ಸುಮಾರು ಐದು ನಿಮಿಷಗಳಾದರೂ ಮಸಾಜ್ ಮಾಡಿ. ಬಳಿಕ ಒಂದು ಗಂಟೆಯಾದರೂ ಹಾಗೆಯೇ ಬಿಡಿ. ಬಳಿಕ ಸಲ್ಫೆಟ್ ರಹಿತ ಶಾಂಪೂ ಬಳಸಿ ಸ್ನಾನ ಮಾಡಿ ಕಂಡಿಷನರ್ ನಿಂದ ತೊಳೆದುಕೊಳ್ಳಿ ಉತ್ತಮ ಪರಿಣಾಮಕ್ಕಾಗಿ ವಾರಕ್ಕೆರಡು ಬಾರಿ ಅನುಸರಿ
ಈರುಳ್ಳಿಯ ರಸ
ಈರುಳ್ಳಿಯ ರಸವನ್ನು ನೆತ್ತಿಯ ಚರ್ಮಕ್ಕೆ ಹಚ್ಚಿಕೊಂಡಾಗ ಚರ್ಮದಲ್ಲಿ ಕ್ಯಾಟಲೇಸ್ ಎಂಬ ಕಿಣ್ವ ಉತ್ಪತ್ತಿಯಾಗಲು ಪ್ರಚೋದನೆ ದೊರಕುತ್ತದೆ. ಇದು ಕೂದಲ ಬೆಳವಣಿಗೆಗೆ ನೆರವಾಗುತ್ತದೆ. ಅಲ್ಲದೇ ಇದರಲ್ಲಿ ಗಂಧಕವೂ ಹೆಚ್ಚಿನ ಪ್ರಮಾಣದಲ್ಲಿದ್ದು ಕೂದಲ ಬುಡಗಳಿಗೆ ಹೆಚ್ಚಿನ ಪೋಷಣೆ ಒದಗಿಸುತ್ತದೆ. ನಿಯಮಿತವಾಗಿ ಬಳಸಿದರೆ ತಲೆಯ ಚರ್ಮದ ಆರೋಗ್ಯ ಉತ್ತಮವಾಗಿರುತ್ತದೆ.
ತಯಾರಿಸುವ ವಿಧಾನ:
ಒಂದು ದೊಡ್ಡ ಈರುಳ್ಳಿಯನ್ನು ಕೊಚ್ಚಿ ಜ್ಯೂಸರ್‌ನಲ್ಲಿ ಚೆನ್ನಾಗಿ ಕಡೆದು ಹಿಂಡಿ ರಸ ಸಂಗ್ರಹಿಸಿ. ಒಂದು ಹತ್ತಿಯುಂಡೆಯನ್ನು ಈ ರಸದಲ್ಲಿ ಅದ್ದಿ ತಲೆಯ ಚರ್ಮದ ಭಾಗಕ್ಕೆ ತಾಕುವಂತೆ ಹಚ್ಚಿಕೊಳ್ಳಿ. ಸುಮಾರು ಒಂದು ಘಂಟೆ ಹಾಗೇ ಬಿಟ್ಟು ಬಳಿಕ ತಣ್ಣೀರಿನಿಂದ ತೊಳೆದುಕೊಳ್ಳಿ. ಉತ್ತಮ ಪರಿಣಾಮಕ್ಕಾಗಿ ವಾರಕ್ಕೊಂದು ಬಾರಿ ಅನುಸರಿಸಿ.
*ಕೊಬ್ಬರಿ ಎಣ್ಣೆ & ಹಾಲು
ಕೊಬ್ಬರಿ ಎಣ್ಣೆ ಆಂಟಿ ಆಕ್ಸಿಡೆಂಟುಗಳಿಂದ ಸಮೃದ್ದವಾಗಿದ್ದು ತಲೆಯ ಚರ್ಮವನ್ನು ರಕ್ಷಿಸುತ್ತದೆ ಹಾಗೂ ತಲೆಗೂದಲನ್ನು ತುಂಡಾಗುವುದರಿಂದ ತಡೆಯುತ್ತದೆ.
ಅಗತ್ಯವಿರುವ ಸಾಮಾಗ್ರಿಗಳು:
*1 ದೊಡ್ಡ ಚಮಚ ತೆಂಗಿನ ಹಾಲು
*1 ದೊಡ್ಡ ಚಮಚ ಕೊಬ್ಬರಿ ಎಣ್ಣೆ
ತಯಾರಿಸುವ ವಿಧಾನ:
* ಒಂದು ಬೋಗುಣಿಯಲ್ಲಿ ಎರಡನ್ನೂ ಹಾಕಿ ಮಿಶ್ರಣ ಮಾಡಿ. ಬಳಿಕ ತಲೆಯ ಚರ್ಮಕ್ಕೆ ತಾಕುವಂತೆ ಹಚ್ಚಿ ಹತ್ತು ನಿಮಿಷ ಒಣಗಲು ಬಿಡಿ.
* ಬಳಿಕ ನಿಮ್ಮ ನಿತ್ಯದ ಶಾಂಪೂ ಬಳಸಿ ಸ್ನಾನ ಮಾಡಿ ಕಂಡೀಶನರ್ ನಿಂದ ತೊಳೆದುಕೊಳ್ಳಿ. ಬಳಿಕ ತಾನಾಗಿಯೇ ಕೂದಲು ಒಣಗಲು ಬಿಡಿ
*ಉತ್ತಮ ಪರಿಣಾಮಕ್ಕಾಗಿ ವಾರಕ್ಕೆರಡು ಬಾರಿ ಅನುಸರಿ
ಪೇರಳೆ ಅಥವಾ ಸೀಬೆಯ ಎಲೆಗಳು
ಜೀವಸತ್ವಗಳು ಮತ್ತು ಅಗತ್ಯ ಪೋಷಕಾಂಶಗಳೊಂದಿಗೆ ಸಮೃದ್ದವಾಗಿರುವ ಪೇರಳೆ ಎಲೆಗಳು ನಿಮ್ಮ ಕೂದಲಿನ ಬುಡಕ್ಕೆ ಹೆಚ್ಚಿನ ಪೋಷಣೆ ಒದಗಿಸುತ್ತದೆ ಮತ್ತು ಅವುಗಳನ್ನು ಬಲಪಡಿಸುತ್ತವೆ
ತಯಾರಿಸುವ ವಿಧಾನ:
* ಇದರ ಲೇಪವನ್ನು ತಯಾರಿಸಲು ಕೆಲವು ಪೇರಲ ಎಲೆಗಳನ್ನು ಪುಡಿಮಾಡಿ. ಅದನ್ನು ಬಟ್ಟಲಿಗೆ ಹಾಕಿ.. ಇದಕ್ಕೆ ಸ್ವಲ್ಪ ಈರುಳ್ಳಿ ರಸವನ್ನು ಸೇರಿಸಿ ಮತ್ತು ಸರಿಯಾಗಿ ಮಿಶ್ರಣವಾಗುವವರೆಗೆ ಬೆರೆಸಿ. ಇದನ್ನು ನಿಮ್ಮ ನೆತ್ತಿಯ ಮೇಲೆ ಹಚ್ಚಿ ಸುಮಾರು 15 ನಿಮಿಷಗಳ ಕಾಲ ಹಾಗೇ ಬಿಡಿ.
* ನಿಮ್ಮ ನಿತ್ಯದ ಶಾಂಪೂ ಮತ್ತು ಕಂಡಿಷನರ್‌ನಿಂದ ತೊಳೆದುಕೊಳ್ಳಿ.
