ಕ್ಯಾರೆಟ್ ನಿಂದ ಫೇಸ್ ಪ್ಯಾಕ್ ಹಾಕಿಕೊಂಡರೆ ಸುಂದರ ತ್ವಚೆ carrot face pack

ಸುಂದರವಾಗಿ ಕಾಣಬೇಕೇ? ಹಾಗಾದ್ರೆ ಕ್ಯಾರೆಟ್ ಫೇಸ್ ಪ್ಯಾಕ್ ಬಳಸಿ

ತ್ವಚೆಯ ಮೇಲೆ ಧನಾತ್ಮಕ ಪರಿಣಾಮ ಬೀರುವ ನೈಸರ್ಗಿಕ ಆಹಾರಗಳಲ್ಲಿ ಕ್ಯಾರೆಟ್ ಪ್ರಮುಖವಾಗಿದೆ. ಕ್ಯಾರೆಟ್ಟುಗಳಲ್ಲಿ ಪ್ರಬಲ ಆಂಟಿ ಆಕ್ಸಿಡೆಂಟುಗಳು ಹಾಗೂ ಇತರ ಪೋಷಕಾಂಶಗಳಿದ್ದು ಇವುಗಳು ತ್ವಚೆಯ ಆರೋಗ್ಯಕ್ಕೆ ಪೂರಕವಾಗಿವೆ. ಕ್ಯಾರೆಟ್ ಅನ್ನು ಲೇಪದ ರೂಪದಲ್ಲಿ ಮುಖಕ್ಕೆ ಲೇಪಿಸಿಕೊಳ್ಳಬಹುದು ಅಥವಾ ರಸವನ್ನು ಸಿಂಪಡಿಸಿಕೊಳ್ಳಲೂಬಹುದು

ಆರೋಗ್ಯಕರ, ಕಲೆಯಿಲ್ಲದ ಮತ್ತು ಕಾಂತಿಯುಕ್ತ ತ್ವಚೆ ಪಡೆಯಲು ನಾವು ಹಾತೊರೆಯುತ್ತೇವೆ ಹಾಗೂ ಇದಕ್ಕಾಗಿ ಒಂದು ಹೆಜ್ಜೆ ಮುಂದೆ ಹೋಗಲೂ ಸಿದ್ದರಿದ್ದೇವೆ. ಈ ಕಾರ್ಯವನ್ನು ಮಾಡುತ್ತದೆ ಎಂದು ಸಾರುವ ಭರ್ಜರಿ ಜಾಹೀರಾತುಗಳು ನಮ್ಮ ಹಣದ ಪರ್ಸನ್ನು ಕೊಂಚ ತೆಳ್ಳಗಾಗಿಸುತ್ತವೆಯೇ ಹೊರತು ನಿಜವಾದ ಪರಿಣಾಮ ಕಾಣಬರುವುದಿಲ್ಲ. ಎಷ್ಟೋ ಸಂದರ್ಭಗಳಲ್ಲಿ ಒಳ್ಳೆಯದಿರಬಹುದು ಎಂದು ತಂದ ದುಬಾರಿ ಪ್ರಸಾದನ ಒಂದೆರಡು ಬಾರಿ ಹಚ್ಚಿಕೊಂಡಾಗಲೂ ಯಾವುದೇ ಪರಿಣಾಮ ಬೀರದೇ ಇದ್ದಾಗ ನಿರಾಶರಾಗಿ ಮತ್ತೆ ಬಳಸದೇ ಹೆಚ್ಚಿನ ಪ್ರಮಾಣದ ಪ್ರಸಾಧನ ಹಾಗೇ ಉಳಿದುಬಿಡುತ್ತದೆ.

ತ್ವಚೆಯ ಕಾಳಜಿಗೆ ನೈಸರ್ಗಿಕ ಆರೈಕೆಯೇ ಅತ್ಯುತ್ತಮ ಎಂದು ಹಿರಿಯರು ಹೇಳುತ್ತಾ ಬಂದಿದ್ದರೂ ಥಟ್ಟನೇ ಪರಿಣಾಮವನ್ನು ನೀಡುವ ಕೃತಕ ಪ್ರಸಾಧನಗಳತ್ತಲೇ ನಮ್ಮ ಗಮನ ಹರಿದಿತ್ತು. ಇತ್ತೀಚಿನ ದಿನಗಳಲ್ಲಿ ವಾಸ್ತವ ಎಲ್ಲರಿಗೂ ಅರಿವಾಗತೊಡಗಿದೆ ಹಾಗೂ ಮತ್ತೊಮ್ಮೆ ನೈಸರ್ಗಿಕ ಪ್ರಸಾದನಗಳಿಗೆ ಹೆಚ್ಚಿನ ಬೇಡಿಕೆ ಕುದುರುತ್ತಿದೆ. ವಾಸ್ತವದಲ್ಲಿ, ನೈಸರ್ಗಿಕ ಪ್ರಸಾಧನಗಳೂ ಸಿದ್ಧ ರೂಪದಲ್ಲಿ ಬಳಸಬಹುದು ಎಂಬುದನ್ನು ಬಿಟ್ಟರೆ ಇವನ್ನು ಕೊಳ್ಳುವ ಬದಲು ಇದೇ ಪರಿಣಾಮ ನೀಡುವ ಪ್ರಸಾದನಗಳನ್ನು ಮನೆಯಲ್ಲಿಯೇ ಸುಲಭವಾಗಿ ತಯಾರಿಸಿಕೊಳ್ಳಬಹುದು. ಕೊಂಚ ತಾಳ್ಮೆ, ಕೊಂಚ ಪರಿಶ್ರಮ ಅಷ್ಟೇ ಸಾಕು, ಅಗ್ಗದಲ್ಲಿ, ಅತ್ಯುತ್ತಮ ತ್ವಚೆಯ ಆರೈಕೆಯನ್ನು ಪಡೆಯಬಹುದು.

ತ್ವಚೆಯ ಆರೈಕೆಗೆ ತಾಜಾ ಗಜ್ಜರಿ ಅಥವಾ ಕ್ಯಾರೆಟ್ ಸಾಕಾಗುತ್ತದೆ. ತ್ವಚೆಯ ಆರೈಕೆಯಲ್ಲಿ ಕ್ಯಾರೆಟ್ ನ ಪರಿಣಾಮ ಧನಾತ್ಮಕವಾಗಿದೆ ಎಂದು ಈಗ ಸಾಬೀತುಗೊಂಡಿದೆ. ಕ್ಯಾರೆಟ್ ಸೇವನೆಯಿಂದ ಏನೆಲ್ಲಾ ಪ್ರಯೋಜನಗಳಿವೆ ಎಂಬುದನ್ನು ನಾವು ಓದಿಯೇ ಇದ್ದೇವೆ. ವಿಶೇಷವಾಗಿ ಕಣ್ಣು, ಹೃದಯ, ತ್ವಚೆ, ಕೂದಲುಗಳಿಗೆ ಕ್ಯಾರೆಟ್ ಉತ್ತಮ ಪೋಷಣೆ ಒದಗಿಸುತ್ತದೆ. ಕ್ಯಾರೆಟ್ ಅನ್ನು ಹಸಿಯಾಗಿಯೂ ಬೇಯಿಸಿಯೂ ಸೇವಿಸಬಹುದು. ಹಾಗಾಗಿ ನಾವು ಹಸಿಯಾಗಿ ಸಾಲಾಡ್ ಮೂಲಕವೂ ಬೇಯಿಸಿ ಪಲ್ಯ, ಸಾಂಬಾರ್ ಗಳ ಮೂಲಕವೂ ಸೇವಿಸುತ್ತಾ ಬಂದಿದ್ದೇವೆ. ಇಂದು ಈ ಕ್ಯಾರೆಟ್ ಅನ್ನು ತ್ವಚೆಯ ಆರೈಕೆಗೆ ಹೇಗೆ ಬಳಸಿಕೊಳ್ಳಬಹುದು, ಇದರ ಜಾದೂ ಹೇಗೆ ಕಾರ್ಯನಿರ್ವಹಿಸುತ್ತದೆ ಎಂಬುದನ್ನು ಇಂದಿನ ಲೇಖನದಲ್ಲಿ ನೋಡೋಣ.

ಒಣತ್ವಚೆಗಾಗಿ ಕ್ಯಾರೆಟ್ ಫೇಸ್ ಪ್ಯಾಕ್
ಒಣತ್ವಚೆ ಇರುವ ವ್ಯಕ್ತಿಗಳ ತ್ವಚೆಯಲ್ಲಿ ಎಣ್ಣೆಯ ಅಂಶ ಕಡಿಮೆ ಇರುತ್ತದೆ. ಹಾಗಾಗಿ ಈ ತ್ವಚೆಯ ಹೊರಪದರ ಶುಷ್ಕವಾಗಿರುತ್ತದೆ. ಕ್ಯಾರೆಟ್ ರಸದಲ್ಲಿರುವ ಪೋಷಕಾಂಶಗಳು ಹೊರಚರ್ಮದ ಸೂಕ್ಷ್ಮರಂಧ್ರಗಳಿಂದ ಇಳಿದು ಚರ್ಮದ ಆಳದಿಂದ ಪೋಷಣೆ ಒದಗಿಸುತ್ತವೆ. ತನ್ಮೂಲಕ ಹೆಚ್ಚಿನ ಆರ್ದ್ರತೆ ಒದಗಿಸಿ ತ್ಚಚೆ ಸಹಕ ಕಾಂತಿಯನ್ನು ಪಡೆಯಲು ನೆರವಾಗುತ್ತದೆ.
ವಿಧಾನ: ಒಂದು ಮಧ್ಯಮ ಗಾತ್ರದ ಕ್ಯಾರೆಟ್ ನ ಸುಮಾರು ಅರ್ಧ ಭಾಗವನ್ನು ಸಿಪ್ಪೆ ಸುಲಿದು ಚಿಕ್ಕದಾಗಿ ತುರಿದು ಅರೆಯಿರಿ. ಇದಕ್ಕೆ ಒಂದು ಚಿಕ್ಕ ಚಮಚ ಜೇನು, ಒಂದು ಚಿಕ್ಕ ಚಮಚ ಹಾಲು ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ. ಈ ಲೇಪವನ್ನು ಈಗ ತಾನೇ ತಣ್ಣೀರಿನಿಂದ ತೊಳೆದುಕೊಂಡಿರುವ ಮುಖಕ್ಕೆ ಹಚ್ಚಿ ಕನಿಷ್ಟ ಹದಿನೈದು ನಿಮಿಷ ಹಾಗೇ ಇರಿಸಿ ಬಳಿಕ ತಣ್ಣೀರಿನಿಂದ ತೊಳೆದುಕೊಳ್ಳಿ.

ಎಣ್ಣೆಚರ್ಮಕ್ಕಾಗಿ ಕ್ಯಾರೆಟ್ ಫೇಸ್ ಪ್ಯಾಕ್
ಈ ಬಗೆಯ ತ್ವಚೆ ಇರುವವರ ತ್ವಚೆಯ ಹೊರಪದರ ಸದಾ ತೈಲದಿಂದ ತೇವವಾಗಿರುತ್ತದೆ. ಅಗತ್ಯಕ್ಕೂ ಹೆಚ್ಚು ಪ್ರಮಾಣದ ತೈಲವನ್ನು ಚರ್ಮದ ಗ್ರಂಥಿಗಳು ತಯಾರಿಸುವುದೇ ಇದಕ್ಕೆ ಕಾರಣ. ಈ ಎಣ್ಣೆಯನ್ನು ನಿವಾರಿಸಲು ವಿಟಮಿನ್ ಎ ಅಗತ್ಯವಿದೆ. ಕ್ಯಾರೆಟ್ಟುಗಳಲ್ಲಿ ವಿಟಮಿನ್ ಎ ಸಮೃದ್ಧವಾಗಿವೆ.
ವಿಧಾನ: ಒಂದು ಕಪ್ ನಷ್ಟು ತಾಜಾ ಕ್ಯಾರೆಟ್ ರಸಕ್ಕೆ ತಲಾ ಒಂದು ದೊಡ್ಡ ಚಮಚ ಮೊಸರು, ಕಡ್ಲೆಹಿಟ್ಟು ಮತ್ತು ಲಿಂಬೆರಸವನ್ನು ಬೆರೆಸಿ ಚೆನ್ನಾಗಿ ಮಿಶ್ರಣ ಮಾಡಬೇಕು. ಈ ಲೇಪವನ್ನು ಈಗ ತಾನೇ ತೊಳೆದುಕೊಂಡ ಮುಖ ಮತ್ತು ಕುತ್ತಿಗೆಗೆ ಹಚ್ಚಿಕೊಂಡು ಸುಮಾರು ಅರ್ಧ ಘಂಟೆ ಹಾಗೇ ಬಿಡಬೇಕು. ಬಳಿಕ ಉಗುರುಬೆಚ್ಚನೆಯ ನೀರಿನಿಂದ ತೊಳೆದುಕೊಳ್ಳಬೇಕು. ಎಣ್ಣೆಯ ಪಸೆ ಮರುಕಳಿಸುವ ಪ್ರಮಾಣವನ್ನು ಪರಿಗಣಿಸಿ ಸೂಕ್ತ ಅವಧಿಯ ಬಳಿಕ ಈ ವಿಧಾನವನ್ನು ಪುನರಾವರ್ತಿಸಿ.

ಸತ್ತ ಜೀವಕೋಶಗಳನ್ನು ನಿವಾರಿಸಲು ಕ್ಯಾರೆಟ್ ಫೇಸ್ ಪ್ಯಾಕ್
ನಮ್ಮ ತ್ವಚೆಯ ಹೊರಪದರದಲ್ಲಿ ಸತ್ತ ಜೀವಕೋಶಗಳು ಗಟ್ಟಿಯಾಗಿ ಅಂಟಿಕೊಂಡಿರುತ್ತವೆ. ಕಾಲಕಾಲಕ್ಕೆ ಇದನ್ನು ನಿವಾರಿಸುತ್ತಲೇ ಇರಬೇಕು. ಆದರೆ ಇದನ್ನು ನಿವಾರಿಸಲು ಬಲಪ್ರಯೋಗಿಸಬಾರದು. ಉಗುರುನಿಂದ ಕೆರೆದರೆ ತೆಳ್ಳಗಿನ ಪದರದಂತೆ ಇವು ಬರುತ್ತದಾದರೂ ಇದು ಚರ್ಮಕ್ಕೆ ಘಾಸಿಯುಂಟು ಮಾಡಬಹುದು. ಹಾಗಾಗಿ ಇವನ್ನು ಸಡಿಲಿಸಿ ಸುಲಭವಾಗಿ ನಿವಾರಣೆಯಾಗುವಂತೆ ಮಾಡುವುದು ಉತ್ತಮ ಕ್ರಮವಾಗಿದೆ. ಈ ಕಾರ್ಯವನ್ನು ಕ್ಯಾರೆಟ್ ಸಮರ್ಥವಾಗಿ ನಿಭಾಯಿಸುತ್ತದೆ.
ವಿಧಾನ: ಸಮಪ್ರಮಾಣದಲ್ಲಿ ಕ್ಯಾರೆಟ್ ರಸ, ಮೊಸರು ಮತ್ತು ಮೊಟ್ಟೆಯ ಬಿಳಿಭಾಗವನ್ನು ಚೆನ್ನಾಗಿ ಬೆರೆಸಿ ಮಿಶ್ರಣ ಮಾಡಿ. ಈ ಲೇಪವನ್ನು ಈಗ ತಾನೇ ತಣ್ಣೀರಿನಿಂದ ತೊಳೆದುಕೊಂಡ ಮುಖಕ್ಕೆ ಹಚ್ಚಿ ಸುಮಾರು ಹದಿನೈದು ನಿಮಿಷ ಬಿಡಿ. ಬಳಿಕ ಉಗುರು ಬೆಚ್ಚನೆಯ ನೀರಿನಿಂದ ತೊಳೆದುಕೊಳ್ಳಿ. ಸತ್ತ ಜೀವಕೋಶಗಳ ಪದರ ಕರಗಿ ಪೂರ್ಣವಾಗಿ ಹೋಗಿರುತ್ತದೆ. ಇದು ತ್ವಚೆಯ ಸಹಜವರ್ಣ ಮತ್ತು ಸಹಜ ಕಾಂತಿಯನ್ನು ಪ್ರಕಟಿಸುತ್ತದೆ.

ಸೂರ್ಯನ ಕಿರಣಗಳಿಂದ ರಕ್ಷಣೆ ಪಡೆಯಲು
ಕ್ಯಾರೆಟ್ಟುಗಳಲ್ಲಿರುವ ಬೀಟಾ ಕ್ಯಾರೋಟೀನ್ ಮತ್ತು ಕ್ಯಾರೋಟಿನಾಯ್ಡು ಗಳು ತ್ವಚೆಯನ್ನು ಸೂರ್ಯನ ಹಾನಿಕಾರಕ ಅತಿನೇರಳೆ ಕಿರಣಗಳಿಂದ ರಕ್ಷಿಸುತ್ತವೆ. ಅಲ್ಲದೇ ಈಗಾಗಲೇ ಬಿಸಿಲಿಗೆ ಕಪ್ಪಗಾಗಿದ್ದ ತ್ವಚೆಯ ಭಾಗವೂ ಸಹಜ ವರ್ಣ ಪಡೆಯಲು ನೆರವಾಗುತ್ತದೆ.
ವಿಧಾನ: ಸಮಪ್ರಮಾಣದ ಕ್ಯಾರೆಟ್ ರಸ ಮತ್ತು ಗುಲಾಬಿ ನೀರನ್ನು ಮಿಶ್ರಣ ಮಾಡಿ ಒಂದು ನೀರು ಸಿಂಪಡಿಸುವ ಬಾಟಲಿಯಲ್ಲಿ ಸಂಗ್ರಹಿಸಿ. ಪ್ರತಿ ಬಾರಿ ಬಿಸಿಲಿಗೆ ಹೋಗುವ ಕೊಂಚ ಹೊತ್ತಿನ ಮುನ್ನವೇ ಈ ದ್ರವವನ್ನು ಮುಖಕ್ಕೆ ಮತ್ತು ಬಿಸಿಲಿಗೆ ಒಡ್ಡಿಕೊಳ್ಳುವ ತ್ವಚೆಯ ಭಾಗಗಳಿಗೆ ಹಚ್ಚಿಕೊಳ್ಳಿ.

ವೃದ್ಧಾಪ್ಯವನ್ನು ತಡವಾಗಿಸಲು ಕ್ಯಾರೆಟ್ ರಸ
ವೃದ್ಧಾಪ್ಯದ ಚಿಹ್ನೆಗಳಾದ ನೆರಿಗೆಗಳು, ಸೂಕ್ಷ್ಮ ಗೆರೆಗಳು, ಜೋಲುಬೀಳುವ ಚರ್ಮ ಮೊದಲಾದವು ವಯಸ್ಸನ್ನು ಇರುವುದಕ್ಕಿಂತಲೂ ಹೆಚ್ಚಾಗಿ ತೋರಿಸುತ್ತವೆ. ಈ ಸ್ಥಿತಿ ಬರದೇ ಇರಲು ಚರ್ಮದ ಸೆಳೆತವನ್ನು ಹೆಚ್ಚಿಸುವುದೇ ಉತ್ತಮ ಮಾರ್ಗ. ಕ್ಯಾರೆಟ್ ನಲ್ಲಿ ಈ ಕ್ಷಮತೆ ಇದೆ.
ವಿಧಾನ:ಸಮಪ್ರಮಾಣದಲ್ಲಿ ಕ್ಯಾರೆಟ್ ರಸ, ಆಲೋ ವೆರಾ ಅಥವಾ ಲೋಳೆಸರದ ತಿರುಳು ಇವೆರಡನ್ನೂ ಚೆನ್ನಾಗಿ ಮಿಶ್ರಣ ಮಾಡಿ ನಿಯಮಿತವಾಗಿ ಚರ್ಮಕ್ಕೆ ಹಚ್ಚಿಕೊಳ್ಳುತ್ತಾ ಬರಬೇಕು. ಕ್ಯಾರೆಟ್ ನಲ್ಲಿರುವ ವಿಟಮಿನ್ ಸಿ ತ್ವಚೆಯಲ್ಲಿ ಕೊಲ್ಯಾಜೆನ್ ಅಂಶವನ್ನು ಹೆಚ್ಚು ಉತ್ಪಾದಿಸುವ ಮೂಲಕ ಚರ್ಮಕ್ಕೆ ಯಾವುದೇ ಕೊರತೆಯಾಗದಂತೆ ಹಾಗೂ ಕೊಲ್ಯಾಜೆನ್ ಕೊರತೆಯಿಂದ ಎದುರಾಗುವ ನೆರಿಗೆಗಳು ಮೂಡದಂತೆ ತಡೆಯುತ್ತದೆ. ತನ್ಮೂಲಕ ವೃದ್ದಾಪ್ಯವನ್ನೂ ತಡವಾಗಿಸುತ್ತದೆ.